<p><strong>ഭാര്യയെക്കാൾ കൂടുതൽ 'ക്രിപ്റ്റോ'യെ പ്രണയിച്ചവൻ, ദമ്പതികളുണ്ടാക്കിയ കരാർ വായിച്ചാൽ ചിരിച്ചുപോകും</strong><br><br>ഇന്ന് പ്രണയദിനമാണ്, അഥവാ പ്രണയികളുടെ ദിനം -വാലന്റൈൻസ് ഡേ. എന്നാൽ, ഒരു ഭാര്യയും ഭർത്താവും തമ്മിൽ തയ്യാറാക്കിയിരിക്കുന്ന ഒരു കരാറാണ് ഇപ്പോൾ സോഷ്യൽ മീഡിയയിൽ ആളുകളെ ചിരിപ്പിച്ചു കൊണ്ടിരിക്കുന്നത്. <br><br>വീട്ടിൽ പാലിക്കേണ്ടുന്ന ചില നിയമങ്ങളാണ് ഈ കരാറിൽ പറയുന്നത്. കരാർ കാണുമ്പോൾ മനസിലാവുന്നത് ഭർത്താവ് ക്രിപ്‌റ്റോകറൻസി ട്രേഡിംഗ് ആപ്പുകളിൽ സജീവമാണ് എന്നാണ്. ശുഭമാണ് കരാറിലെ പാർട്ടി 1, ഭാര്യ അനയ പാർട്ടി 2 ഉം. രണ്ടാളും തമ്മിലുള്ള ഈ കരാർ ലംഘിച്ചു കഴിഞ്ഞാൽ അതിന്റെ പരിണിത ഫലങ്ങൾ അല്പം പ്രശ്നമാണ്. ഈ നിയമങ്ങൾ ലംഘിച്ചാൽ വരുന്ന മാസങ്ങളിലെ മുഴുവൻ വീട്ടുജോലികളും നിയമം ലംഘിക്കുന്നവർ ചെയ്യേണ്ടി വരും. <br><br>നിയമങ്ങളിൽ ശുഭം പാലിക്കേണ്ടതായി പറയുന്നത്, ഡൈനിങ് ടേബിളിൽ ട്രേഡിം​ഗ് മാർക്കറ്റിനെ കുറിച്ച് ഒന്നും പറയരുത് എന്നാണ്. അതുപോലെ ബെഡ്‍റൂമിലും ഇതുമായി ബന്ധപ്പെട്ട കാര്യങ്ങളൊന്നും പറയാൻ അനുവാദമില്ല. 'എന്റെ ബ്യൂട്ടി കോയിൻ', 'എന്റെ ക്രിപ്റ്റി പൈ' തുടങ്ങിയ വാക്കുകൾ ഭാര്യ അയനയെ വിളിക്കാൻ ഉപയോ​ഗിക്കരുത്. രാത്രി 9 മണിക്ക് ശേഷം ഇത്തരം ആപ്പുകളിലോ യൂട്യൂബ് വീഡിയോ കാണുന്നതിലോ സമയം ചെലവഴിക്കരുത്. ഇതൊക്കെയാണ് ശുഭം പാലിക്കേണ്ടുന്ന നിയമങ്ങൾ. <br><br>അനയ പാലിക്കേണ്ടുന്ന നിയമങ്ങൾ ഇവയൊക്കെയാണ്: അമ്മയെ ശല്ല്യപ്പെടുത്തുന്നതിന് ശുഭത്തിനെ കുറ്റം പറയാതിരിക്കുക, വഴക്കിടുമ്പോൾ ശുഭത്തിന്റെ മുൻകാമുകിയെ അതിൽ വലിച്ചിടാതിരിക്കുക, വില കൂടിയ സ്കിൻ കെയർ പ്രൊഡക്ട് വാങ്ങാതിരിക്കുക, രാത്രിയിൽ സ്വി​ഗിയിൽ നിന്നും സൊമാറ്റോയിൽ നിന്നും ഭക്ഷണം ഓർഡർ ചെയ്യാതിരിക്കുക. <br><br>എന്തായാലും, ഈ വാലന്റൈൻസ് ഡേയിൽ ഇവരുടെ കരാർ വലിയ ചിരിയാണ് സോഷ്യൽ മീഡിയയിലുണ്ടാക്കുന്നത്. നിരവധിപ്പേരാണ് ഈ മുദ്രപത്രത്തിന്റെ ചിത്രത്തിന് കമന്റുകളുമായി എത്തിയത്. എന്നാലും, ശുഭം ഭാര്യയേക്കാൾ കൂടുതൽ ക്രിപ്റ്റോയെ ആണോ സ്നേഹിക്കുന്നത് എന്ന് ചോദിച്ചവരുണ്ട്. അതേസമയം, ഇത് ശരിക്കും ഉള്ളതാവില്ല, ആരെങ്കിലും തമാശയ്ക്ക് ചെയ്തതാവാം എന്ന് അഭിപ്രായപ്പെട്ടവരും&nbsp;ഉണ്ട്.<br><br></p>