<p><strong>പത്തനംതിട്ടയിൽ ശബരിമല ബസുമായി കാർ കൂട്ടിയിടിച്ച് നവദമ്പതികൾ ഉൾപ്പെടെ നാല് പേർ മരിച്ചു</strong><br><br>പത്തനംതിട്ട: ഞായറാഴ്ച പുലർച്ചെ കൂടൽ മുറിഞ്ഞക്കലിൽ ശബരിമല തീർഥാടകർ സഞ്ചരിച്ചിരുന്ന ബസും കാറും കൂട്ടിയിടിച്ച് നവദമ്പതികൾ ഉൾപ്പെടെ ഒരു കുടുംബത്തിലെ നാല് പേർ മരിച്ചു. കോന്നി മല്ലശ്ശേരി സ്വദേശികളായ മത്തായി ഈപ്പൻ, അനു, നിഖിൽ, ബിജു ജോർജ് എന്നിവരാണ് മരിച്ചത്.<br><br>തിരുവനന്തപുരം വിമാനത്താവളത്തിൽ നിന്ന് വീട്ടിലേക്ക് മടങ്ങുന്നതിനിടെയാണ് അപകടമുണ്ടായത്. ബിജുവിൻ്റെ മകൾ അനുവും ഈപ്പൻ്റെ മകൻ നിഖിലും മലേഷ്യയിൽ ഹണിമൂൺ കഴിഞ്ഞ് വിമാനത്താവളത്തിലെത്തി. നിഖിൽ കാനഡയിൽ ജോലി ചെയ്തിരുന്നതായാണ് വിവരം. നവംബർ 30നാണ് ഇരുവരും വിവാഹിതരായത്.<br><br>പുനലൂർ-മൂവാറ്റുപുഴ സംസ്ഥാന പാതയിൽ പുലർച്ചെ 4.05 ഓടെയാണ് അപകടം. ഡ്രൈവർ ഉറങ്ങിപ്പോയതിനെ തുടർന്നാണ് ആന്ധ്രയിൽ നിന്നുള്ള തീർഥാടകർ സഞ്ചരിച്ച കാർ ബസുമായി കൂട്ടിയിടിച്ചതെന്നാണ് പൊലീസ് നിഗമനം. കൂട്ടിയിടിയിൽ ഡ്രൈവർ ഉൾപ്പെടെ ബസിലെ ഏതാനും യാത്രക്കാർക്ക് നിസാര പരിക്കേറ്റു.<br><br>പോലീസും ഫയർഫോഴ്‌സും സംഭവസ്ഥലത്തെത്തി ഹൈഡ്രോളിക് കട്ടർ ഉപയോഗിച്ച് കാറിനുള്ളിൽ കുടുങ്ങിയ നാലുപേരെയും പുറത്തെടുത്തു. എന്നാൽ മൂന്ന് പേർ സംഭവസ്ഥലത്ത് വെച്ച് തന്നെ മരിക്കുകയും യുവതി പത്തനംതിട്ടയിലെ സ്വകാര്യ ആശുപത്രിയിൽ വെച്ച് മരണത്തിന് കീഴടങ്ങുകയും ചെയ്തു. <br><br>അനുവിൻ്റെ മൃതദേഹം ഇപ്പോൾ സ്വകാര്യ ആശുപത്രി മോർച്ചറിയിലും മൂന്നു പേരുടെ മൃതദേഹം കോന്നി താലൂക്ക് ആശുപത്രിയിലും സൂക്ഷിച്ചിരിക്കുകയാണ്. ഇൻക്വസ്റ്റ് നടപടികൾ ആരംഭിച്ചതായും കുവൈറ്റിലുള്ള നിഖിലിൻ്റെ സഹോദരി നാട്ടിൽ തിരിച്ചെത്തിയാലുടൻ നാലുപേരുടെയും അന്ത്യകർമങ്ങൾ നടത്തുമെന്നും മനോരമ ന്യൂസ് റിപ്പോർട്ട് ചെയ്തു.<br><br>പുനലൂർ-മൂവാറ്റുപുഴ സംസ്ഥാന പാതയുടെ ഈ ഭാഗത്ത് റോഡ് പുനർനിർമിച്ചതിനെ തുടർന്ന് അപകടങ്ങൾ വർധിക്കുന്നതായി പ്രദേശവാസികൾ&nbsp;ആരോപിച്ചു.<br><br></p>