International

2100 രൂപയുടെ ഫുഡ് കൂപ്പൺ ദുരുപയോ​ഗം ചെയ്തു;3 കോടി വരുമാനമുള്ള ജീവനക്കാരനെ ഉൾപ്പെടെ പുറത്താക്കി മെറ്റ

2100 രൂപയുടെ ഫുഡ് കൂപ്പൺ ദുരുപയോ​ഗം ചെയ്തു;3 കോടി വരുമാനമുള്ള ജീവനക്കാരനെ ഉൾപ്പെടെ പുറത്താക്കി മെറ്റ

ലോസ് ആഞ്ജലിസ്: ഭക്ഷണത്തിന് അനുവദിച്ച ക്രെഡിറ്റ് വൗച്ചർ ദുരുപയോ​ഗം ചെയ്തുവെന്ന പേരിൽ 24 ജീവനക്കാരെ മെറ്റ പുറത്താക്കിയെന്ന് റിപ്പോർട്ടുകൾ. ഏകദേശം 25 ഡോളറിൻ്റെ (2,101 രൂപ) വൗച്ചർ ദുരുപയോ​ഗം ചെയ്ത ലോസ് ആഞ്ജലിസിലുള്ള ഓഫീസിലെ ജീവനക്കാരെയാണ് കമ്പനി പുറത്താക്കിയത്. മൂന്നരക്കോടി രൂപയോളം വാർഷിക വരുമാനമുള്ള ജീവനക്കാരനും പുറത്താക്കിയവരിൽ ഉൾപ്പെടുന്നുവെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്.

എന്നാൽ ഭക്ഷണത്തിന് പകരം ടൂത്ത്പേസ്റ്റ്, വെെൻ, സോപ്പ്​ മുതലായവ വാങ്ങാനായി ജീവനക്കാർ വൗച്ചർ ദുരുപയോ​ഗം ചെയ്തുവെന്നാണ് റിപ്പോർട്ടുകൾ. ജോലിക്കെത്താത്ത സമയത്ത് പലരും വീട്ടിലേയ്ക്ക് ഭക്ഷണം വരുത്തിയതായും വിവരങ്ങളുണ്ട്. അന്വേഷണത്തിന് ഒടുവിലാണ് മെറ്റയുടെ പുറത്താക്കൽ നടപടി. ഭക്ഷണത്തിൻ്റെ വൗച്ചറിൽ ​ഗുരുതരമല്ലാത്ത തിരിമറി കാണിച്ച ചില ജീവനക്കാരെ പുറത്താക്കാതെ താക്കീത് നൽകി ക്ഷമിച്ചുവെന്നും റിപ്പോർട്ടുകളുണ്ട്.

അതേസമയം, മെറ്റയിൽ അടുത്ത റൗണ്ട് കൂട്ടപ്പിരിച്ചുവിടലും ആരംഭിച്ചിട്ടുണ്ട്. വാട്സാപ്പ്, ഫെയ്സ്ബുക്ക്, ഇൻസ്റ്റ​ഗ്രാം തുടങ്ങിയ പ്ലാറ്റ്ഫോമുകളിലെ ജീവനക്കാരെയാണ് പിരിച്ചുവിടൽ ബാധിച്ചിരിക്കുന്നത്. എത്രപേരെയാണ് ഇത്തവണ മെറ്റ പുറത്താക്കാൻ ഉദ്ദേശിക്കുന്നതെന്ന് വ്യക്തമാക്കിയിട്ടില്ല.