<p><strong>'നിർഭാ​ഗ്യകരമായ അവസ്ഥ, പൃഥ്വിരാജിന് നേരെ സംഘടിതമായ ആക്രമണം'; എമ്പുരാൻ വിവാദത്തിൽ ആഷിഖ് അബു</strong><br><br>മോഹൻലാൽ- പൃഥ്വിരാജ് കോമ്പോയിൽ എത്തിയ എമ്പുരാൻ സിനിമാ വിവാദത്തിൽ പ്രതികരണവുമായി സംവിധായകൻ ആഷിഖ് അബു. എമ്പുരാന്റേത് വളരെ നിർഭാ​ഗ്യകരമായൊരു അവസ്ഥയാണെന്നും പൃഥ്വിരാജിന് വ്യക്തിപരമായി പൂർണ പിന്തുണ നൽകുന്നുവെന്നും ആഷിഖ് അബു ഏഷ്യാനെറ്റ് ന്യൂസിനോട് പറഞ്ഞു. <br><br>നമ്മുടെ എല്ലാവരുടെയും മൗനം കണ്ട് സഹിക്കാൻ പറ്റാത്തോണ്ടായിക്കണം മല്ലിക സുകുമാരനെ പോലൊരു അമ്മയ്ക്ക് ശക്തമായി സംസാരിക്കേണ്ടി വന്നതെന്നും സംവിധായകൻ പറഞ്ഞു. പൃഥ്വിരാജിന് നേരെ നടക്കുന്നത് സംഘടിതമായ ആക്രമമാണെന്നും അദ്ദേഹം പറയുന്നു. <br><br>ആഷിഖ് അബുവിന്റെ വാക്കുകൾ ഇങ്ങനെ<br><br>എനിക്ക് സിനിമ ഇതുവരെ കാണാൻ സാധിച്ചിട്ടില്ല. കഴിഞ്ഞ ദിവസങ്ങളിലായി എമ്പുരാനെതിരെ വരുന്ന വിവാദങ്ങൾ ഞാനും ശ്രദ്ധിക്കുന്നുണ്ട്. വളരെ നിർഭാ​ഗ്യകരമായൊരു അവസ്ഥ ഉണ്ടെന്ന തിരിച്ചറിവ് ഒരിക്കൽ കൂടി, ഭയപ്പാടോട് കൂടി കാണേണ്ട അവസ്ഥ. അത് മലയാളത്തിലെ ഏറ്റവും വലിയ സിനിമയ്ക്ക് നേരെ തന്നെ വരികയും ഭീഷണിക്ക് വഴങ്ങുകയും ചെയ്ത ഏറ്റവും സങ്കടകരമായ അവസ്ഥയിലാണ് നമ്മളൊക്കെ ഉള്ളത്. <br><br>മലയാളത്തിലെ ഏറ്റവും പ്രമുഖരായിട്ടുള്ള ഫിലിം മേക്കേഴ്സ്, വലിയൊരു ബാനർ, ആന്റണി പെരുമ്പാവൂരിനെ പോലെ ആഘോഷിക്കപ്പെടുന്ന നിർമാതാവ് തുടങ്ങി വലിയൊരു സംഘം ചെയ്ത സിനിമക്കാണ് ഈ ദുർവിധി ഉണ്ടായിരിക്കുന്നത്. ഭീഷണിക്ക് വഴങ്ങേണ്ടി വന്നിട്ടുള്ളത്. ഉറപ്പായുമത് ആശങ്കപ്പെടുത്തുന്ന&nbsp;കാര്യവുമാണ്.<br><br></p>